மழைக்கால காலை நேரப் பயணமாய்
உனைப் பின் தொடர்கிறேன் நான்
நமக்குள் எல்லாம் முடிந்து விட்டதாய் சாலையின்
சாக்கடையை வாரியிறைத்துப் போகிறாய் நீ
சாக்கடை படிந்த என்னை முழுவதுமாய்
நனைத்துப் போகிறது உன்னுடனான நினைவுகளின் பெருமழை!
#
இந்தப் பிறந்தநாளுக்கு பலமுறை வாழ்த்திய
உனதன்பினில் மனமகிழ்ந்திருந்தேன்
இனிவரும் எல்லாப் பிறந்த நாளுக்குமான
மொத்தமான வாழ்த்துக்களே அவை
என்றறிந்ததும் மன____________!
(வரிகளை முழுமைப் படுத்திடும் வலிமை இல்லை எனக்கு)
#
மதிப்பிடவியலா தங்கத் தருணங்கள்
உன் மீதான காதலில் என்றவனிடம்
வாழ்வின் கொடுங்குற்றக் கனங்கள்
என் மீதான காதல் என்கிறாய்
தன் விசும்பல் ஒலியினை மறைத்து அழுதிட
பேரிரைச்சலான இடங்களைத் தேடிப் போகிறது நம் காதல்!
#
மயானபூமியில் சதைப்பிண்டமாய் நானிருக்க
எல்லாம் முடிந்து விட்டதென எரியூட்டிப் போகிறாய் நீ
எரிந்து முடித்தபின் நெற்றிப்பொட்டு நாணயமாய்,
மிஞ்சிய எலும்புத்துண்டுகளாய் நம் நினைவுகள்…!!!
